حقيقه الكلمه الحلوه وجبر الخاطر جواز سفر وهي البتكون موجوده ما ح تتنسي .. نسمه كانت منتظره مؤيد يرجع ليها بي تلفون خصوصا بعد ما يقراء الرساله الفي الورقه ما كانت عارفه انو عمل حادث وفقد تلفونو وكان ح يفقد نفسو بقت طول اليوم سرحانه وبالها مشغول حاولت تتصل عليهو وتسلم عليهو نظام وصلت كيف وكدا بس للاسف التلفون ما بخش معاها 💔 بقت تحاول في الرقم طول اليوم بس بدون فايده حست انو اعجابو بيها مجرد اعجاب او واحد شاف واحده واعجب بيها بس مافي حاجه في قلبو من ناحيتها حست انها مكتأبه ونفسياتها في الارض لانها دا الوحيد القلبها دقه عشانو دا اول حب في حياتها مع انو ما قعدت معاهو بس كانت من اول نظره شافت فيهو فارس احلامها شافت الشخصيه البتتمناها اي بت من اول يوم شافتو فيها بقي قلبها متعلق بيهو بقي تفكيرها كلو فيهو وهو نفس الاحساس كان بفكر فيها علي طول صورتها ما كانت بتفارق خيالو بس بقت مشكله التواصل كيف .. كانو قاعدين كلهم مؤيد وامو وموده اختو وميعاد بتونسو في الحديقه بتاعه البيت كان عمرو ولد موده متعلق لي مؤيد في رقبتو طبعا مؤيد بحبو شديد قال لي يا خالو انت مش قلت لي بسوقك المنتزه وتركبني في الساقيه مؤيد قال ليهو يا حبيب خالو انا هسي بسوقك افسحك نشمي الحدايق وتمشي اي محل انت عايزو قام قال ليهم رايكم شنو نمشي الكاسح امو قالت ليهو امشو انتو انا ما بقدر امشي قام جاء سلم عليها في راسها وقال ليها لو ما كانت ملكتنا معانا مافي داعي يودينا نحنا 😍 قالت لي والله انت طريقه الزول ينفك منك بيها مافي 😁 بس الله يجيب ليك بت حلال تسوقك مني قال ليها دي منو البتسوقني منك انتي الخير والبركه .. قامو فاتو الكاسح وعدو يوم حلو شديد ونسه وضحك وهظار مؤيد مع اخواتو اكتر من صاحب يعني لو زول شافو بتونس معاهم ما بقول ديل اخواتو كان هو ليهم نعم السند بعد ابوهو الله يرحمو مات كان مديهم الثقه في نفسهم حتي ميعاد اي حاجه بتحصل معاها في الجامعه كانت بتحكيها ليهو ❤ طلعو من الكاسح مشو البيت مؤيد اتزكر نسمه وبعدو منها بس يصل ليها كيف اتزكر
قال لو طلعت رقمي القديم احتمال تتصل فيهو مشي مكتب زين طلع رقمو علي امل انها تتصل فيهو .. مرت الايام والشهور ومافي اي خبر ومافي زول اتصل ليهو غير اصحابو وناس الشغل اليوم داك كان خاشي في الواتساب قامت نسمه خشت لقتو متصل بس ابت ترسل ليهو قالت لو هو اصلا بحبني وعندو لي حاجه ما بقيف مني الزمن دا كلو في الفتره الفاتت نسمه جاها عريس بس رفضت كان قلبها متعلق بيهو شديد وكانت في الدقيقه بتموت الف مره وهو بعيد وما شغال بيها ولا حتي اتصال تسمع صوتو مافي بس كانت عايشه علي امل .. وهو كان تفكيرو كلو فيها وكيف يصل ليها فتش كل الطرق عشان يوصل ليها بس كل الطرق بتكون مسدوده فتش علي حسابها في الفيس بس كانت الاسامي كتيره ما عرف حسابها ياتو وهي زاتها ما كاتبه اسمها الحقيقي 😁 كانت خاشه بي زهره البنفسج 💜 وهو كان ببحث بي نسمه البرسل ليها رساله كلها بتقطعو معاهو ناشف وبتحظرو 😂 لما الموضوع طال يوم كدا نسمه اتشجعت وقالت ابادر انا واشوف ردة فعلو ح تكون شنو ..
